Galmudug oo shuruud ku xirtay ka qaybgalka shirka Golaha Amniga
-
WARIYAHA DHUUSAMAREEB GAROWE ONLINE
- Posted On 11-04-2019, 01:56PM
DHUUSAMAREEB, Galmudug – Maamul goboleedka Galmudug ayaa markii ugu horeysay ka hadlay Shirka Golaha Amniga Qaranka ee uu Madaxwayne Farmaajo isugu yeeray hogaamiyaasha maamuladda.
Shirkaan oo lagu wado in uu dhamaadka bishaan April 2019 ka qabsoomo magaalada caasimada ah ee Muqdisho ayaa la filayaa in diirada lagu saarey amniga, xiriirka maamulada iyo dowlada iyo arrimo kale.
Sidda ku cad war qoraal ah oo kasoo baxay wasaarada warfaafinta Galmudug, maamulkaas ayaa ka qaybgalaya shirkaasi kaliya marka ay Madaxtooyadda Soomaaliya xayiraada ka qaado qoondada uu ku leeyahay deeqda caalamka.
Galmudug ayaa laga joojiyay lacagtaasi iyo gargaar ay ka hesho dunida inteeda kale kadib markii uu qarxay khilaafka Villa Soomaaliya iyo maamulkaasi oo taagan tan iyo sanadkii hore.
Cabdiwali Jaamac Bare, afhayeenka madaxtooyada Galmudug, ayaa u xaqiijiyay warsidaha Garowe Online in bayaanka wasaarada warfaafinta uu yahay mid ay ka war-qabaan hogaanka maamulkaasi.
Galmudug ayaa noqonaya maamulkii ugu horeeyay ee ka fal-celiya casuumaada uu Farmaajo u fidiyay dowladaha xubnaha ka ah dowlada federaalka ee ku aadan kasoo qaybgalka shirka Golaha Amniga.
Hoos ka akhriso war-saxaafadeedka
GAROWE ONLINE
