Gudoomiye dhaawacay Xildhibaan barayey sida Bastoolad loo rido
-
WARIYAHA JOWHAR GAROWE ONLINE
- Posted On 19-09-2019, 01:58PM
JOWHAR, Soomaaliya – Dhacdo naadir ah, gudoomiyaha degmadda Warsheekh ee gobolka Shabeellaha Dhexe, Xasan Xaaji Axmed [Darafey] ayaa dhaawacay Xildhibaan barayey sida loo ganno bastoolad.
Darafey, oo la doortay bishii August ee sanadkan 2019 kadib coddeyn taariikhi ah, ayaa waxaa la sheegay in ay xabadda kaga dhacdey qaab aan ku talogal ahayn.
Markii uu shilkan dhacayay ayaa waxaa la tilmaamay in ay goobta joogeen xubno kale oo maamulka degmadda ka tirsan oo ay qaarkood ka tirsan yihiin Golaha Degaanka.
Mudanaha bukaanka ah oo magaciisa lagu soo koobay Makaraan ayaa waxaa dhaawaciisa lagu sheegay "mid khatar ah".
Illo wareedyo ayaa u sheegay warsidaha Garowe Online in loo soo qaadey Isbitaalka Kasaney ee magaaladda caasimada ee Muqdisho.
Shilkan dhacay ayaa durba hadalheyn xoogan ka abuuray degaanka, waxaana la is-waydiinayaan talaabadda xigta oo la qaadayo.
Warsheekh, oo ah degmo qadiimi ah oo loo dalxiis tago, ayaa qiyaastii 60 KM waxay u jirtaaa magaaladda Muqdisho, caasimadda dalka leh xeebta ugu dheer Afrika.
GAROWE ONLINE
