Gudoomiyihii hore baarlamaanka Soomaaliya oo geeriyooday

Maxamed Cismaan Jawaari ayaa dhintay isaga oo 79-sano jir ah, sidda ay xaqiijiyeen qoyskiisa.

MUQDISHO, Soomaaliya - Guddoomiyihii hore ee Baarlamaanka Soomaaliya Maxamed Cismaan Jawaari ayaa maanta oo Jimco ah ku geeriyooday magaalada Muqdisho isaga oo 79-sano jir ah.

Jawaari ayaa xilal kala duwan ka soo qabtay dowladdii Siyaad Barre oo uu ka mid ahaa wasiirka gaadiidka, shaqada iyo arrimaha bulshada.

Sidoo kale, Jawaari oo ka soo baxay kuliyadaha sharciga ee Soomaaliya ayaa ka hor inta uusan noqon guddoomiye Baarlamaan waxa uu ahaa guddoomiyaha guddiga khubarada dastuurka ee u qaabilsanaa diyaarinta dastuurka hadda jira.

Jawaari ayaa guddoomiyaha baarlamaanka  loo doortay Agoosto 2012; waxaana mar kale dib loo doortay Janaayo 2017.

Bishii April 2018 ayuu xilka iska casilay kadib cadaadis uga yimid dowladda Maxamed Cabdullaahi Farmaajo taasoo ay isku-khilaafeen qaabka loo maareynayo arrimo badan oo masiiri ahaa.

GAROWE ONLINE