Maamulka gobolka Hiiraan oo diidey in ciidanka Masar lagu badalo askarta Itoobiya

Hadalkan ayaa daba socda diidmo ka timid maamulka gobolka Gedo oo kasoo horjeestay in ciidamada Masar la geeyo gobolkooda.

MUQDISHO, Soomaaliya - Maamulka Gobolka Hiiraan ayaa shaaca ka qaaday in aysan waxba la wadaagin Masar, waxayna ka digeen in ciidamada Masar la geeyo bartamaha Soomaaliya.

Maamulka gobolka ayaa carabka ku adkeeyay xiriirka soo jireenka ah ee labada shacab, iyo sidoo kale iskaashiga ganacsiga iyo amniga ee u dhaxeeya Itoobiya iyo Soomaalida, gaar ahaan kuwa gobolka Hiiraan.

“Waxaan leenahay wada shaqeyn dhanka amniga ah, gaashaandhigga, iyo ganacsiga is dhaafsiga Itoobiya, waan isku tiirsannahay, badeecadeena ganacsi waxay si habsami leh uga socotaa Hiiraan ilaa Feerfeer ilaa Jabuuti” ayay yiraahdeen.

"Ma jirto wax naga dhexeeya Masar marka laga reebo inay yihiin waddan Carab ah iyo Muslim, aan wajahno xaqiiqda," ayay raaciyeen.

Hadalkan ayaa daba socda diidmo ka timid maamulka gobolka Gedo oo kasoo horjeestay in ciidamada Masar la keeno Soomaaliya, iyagoo ka digay inay colaad hor leh u abuurto shacabka Soomaaliyeed.

GAROWE ONLINE