Madaxtooyadda oo ka hadashay kulanka safiirka Soomaaliya iyo Trump
-
WARIYAHA MUQDISHO GAROWE ONLINE
- Posted On 18-09-2019, 07:00AM
MUQDISHO, Soomaaliya – Danjiraha cusub ee Soomaaliya u fadhi doona dalka Mareykanka, Cali Shariif, ayaa waxa uu la kulmay madaxweyne Donald Trump.
Trump oo ugu horeyn safiirka ka gudoomay waraaqaha aqoonsiga safiirnimo ayaa waxay kadib yeesheen wada hadalo gaar ah.
Kulankooda ayaa waxaa lagu waramayaa in ay isla soo qaadeen adkeynta iyo iskaashiga danaha ay wadaan labadda waddan.
Cali Shariif oo bedelaya Axmed Ciise Cawad, wasiirka arrimaha dibadda haatan ee Soomaaliya, ayaa horey uga soo shaqeeyay France iyo Ethiopia.
Diblumaasigan ayaa sidoo kale waxa uu Soomaaliya wakiil uga soo ahaa ururka Midowga Afrika iyo Guddiga Dhaqaalaha UN-ka ee Afrika.
Dhinaca kale, Villa Soomaaliya oo ka hadashay kulanka Trump iyo Shariif ayaa shaacisay in ay rajeyneyso in uu adkeeyo cilaaqaadka labadda dal.
"Isaga [safiirka] wuu sii wadanayaa shaqooyinkiisa Washington si uu u sii karaar siiyo xiriirka Soomaaliya-Mareykanka kadib aqbalaada aqoonsigiisa ee mudane realDonaldTrump," ayuu yiri afhayeenka Farmaajo.
Cabdinuur Maxamed oo qoraalkan soo dhigay bartiisa gaarka ah ee Twitter-ka isaga oo adeegsanaya luqada English-ka ayaa waxaa ka fal-celiyey dadyow kala duwan oo aragti kala geidsan dhiibanaya.
Mareykanka ayaa ka taageera Soomaaliya dagaalka argagixisadda, dhaqalaaha, kabida Miisaaniyadda, tababarida ciidamadda iyo barnaamijyadda horumarinta.
GAROWE ONLINE
