Mursal oo wali Go’doon ku jira iyo ciidamo la dul-dhigay Hotel-kiisa

MUQDISHO, Soomaaliya - Waxaa wali go'doon ku jira Gudoomiyaha Gollaha Shacabka, Maxamed Mursal, iyadoo xayiraad la saarey dhaq-dhaqaaqiisa iyo kulamadii Xildhibaanada mucaaradka.

Illo ku dhaw Mursal ayaa Warsidaha Garowe Online u sheegay in Xukuumadda ay ciidamo cusub dhigtay saddex wado oo gasha Hotel-ka Shabeel oo uu degan yahay Gudoomiyaha, iyadoo loo diiday inay la kulmaan Xildhibaanada Mooshin keenay.

Xildhibaanada ayaa laga hor-istaagay inay kasoo gudbaan Kontoroolada laga soo galo Hotel-ka Shabeel oo ku yaalla wadada isku xirta Garoonka diyaaradaha iyo Isgoyska KM-4, waxaana wararku ay sheegeen in ciidamada ay barayaan gaadiidka.

Mursal ayaa dhawaan kasoo guurey hoygii uu ka deganaa Villa Somalia, kadib markii xayiraad la saarey, taasoo ku khasabtay inuu u guuro Hotel-ka uu hadda degan yahay, oo shalay uu ku qabtey Shirkiisii jaraa'id ee ugu horeeyay oo uu kaga hadlay xariga Roobow iyo doorashada Koonfur Galbeed.

Khilaafka siyaasadeed ee taagan ayaa saameyn ku yeeshay shaqooyinkii hay'addaha dowladda Federaalka, iyadoo aan jirin wax kulamo ah oo Gollaha Shacabka ka socda, iyadoo Xukuumadda ay mashquul ku tahay mooshinka laga keenay Farmaajo.

Lama oga halka uu ku biyo shuban doono Mooshinka khilaafka dhaliyay, waxayna Xildhibaanada muxaafidka ay ku doodayan inaan la keeni karin Mooshin eedeyn Madaxweyne ah, illaa laga dhiso Maxkamadda Dastuuriga ah.

GAROWE ONLINE