Puntland iyo Jubbaland oo hal sabab uga baaqday shir Turkiga ku qabanayo Muqdisho

MUQDISHO – Puntland iyo Jubbaland ayaa ka baaqday ka qeybgalka kulamo maanta ka furmi lahaa Muqdisho oo ay qaban-qaabiyeen saraakiil ka tirsan sirdoonka Turkiga, iyagoo sheegay in Ankara aysan ahayn dhinac dhexdhexaad ka ah arrimaha siyaasadeed ee gudaha Soomaaliya, sida ay sheegeen ilo xog-ogaal ah.

Labada maamul ayaa lagu soo waramayaa inay walaac ka muujiyeen doorka Turkiga ee dhex-dhexaadinta khilaafaadka siyaasadeed ee Soomaaliya, gaar ahaan doodaha la xiriira doorashada iyo mustaqbalka siyaasadeed ee dalka.

Puntland iyo Jubbaland ayaa ku doodaya in aan lagu aamini karin Turkiga inuu dhexdhexaadiyo arrimaha masiiriga ah ee siyaasadda Soomaaliya, iyagoo ku eedeeyay Ankara inay taageero dhow la leedahay Dowladda Federaalka Soomaaliya.

Si kastaba, wakiillada Puntland iyo Jubbaland ee ku sugan Muqdisho ayaa la filayaa inay ka qeyb galaan kulan ballaaran oo Khamiista dhici doona, kaas oo ay isugu imanayaan wakiillo ka socda dalalka reer Galbeedka, Turkiga, Dowladda Federaalka iyo mucaaradka.

Kulankaasi ayaa noqon doona kii ugu horreeyay ee rasmi ah oo ay dhammaan dhinacyada waaweyn si toos ah uga wada hadlaan arrimaha doorashada iyo khilaafaadka siyaasadeed ee taagan.

Turkiga ayaa muddo dheer door muuqda ku lahaa arrimaha Soomaaliya, isagoo bixiyay taageero dhinacyada amniga, horumarinta iyo diblomaasiyadda, gaar ahaan xiriirka uu la leeyahay Dowladda Federaalka.

Hase yeeshee, Puntland iyo Jubbaland ayaa hore uga muujiyay Golaha Mustaqbalka walaac ku saabsan ku lug lahaanshaha Ankara ee siyaasadda gudaha Soomaaliya, iyagoo sheegay in Turkigu uusan noqon karin dhinac u kala dab qaada dhinacyada Soomaalida ee ku kala aragti duwan arrimaha doorashada.

Khilaafkan ayaa kusoo beegmaya xilli ay sii xoogeysanayaan kala aragti duwanaanshaha u dhexeeya dowladda federaalka iyo qaar ka mid ah maamul-goboleedyada iyo siyaasiyiinta mucaaradka ah ee ku saabsan hannaanka doorashada iyo maamulka dalka.

GAROWE ONLINE