Qarax culus oo ka dhacay Muqdisho iyo wararkii ugu dambeeyay [Sawirro]

MUQDISHO, Soomaaliya - Qarax gaari ayaa saaka ka dhacay magaaladda Muqdisho kaasoo laga maqlay qeybo badan oo kamid ah caasimadda, iyadoo cirka isku shareertay uuro, sida ay sheegeen goobjoogiyeyaasha.

Gaari lagu soo xiray walxaha qarxa, oo noociisu ahaa Prado ayaa ku qarxay meel ku dhaw Isgoyska aadka u mashquulka badan ee Digfeer, waxaana kasoo baxaya warar kala duwan khasaarihii ka dhashay.

Mid kamid ah dadka ku ganacsada wadada qarkeeda ayaa u sheegay Warsidahaa Garowe Online in qofkii wadey Gaariga uu u muuqday mid aan aqoon badan u lahayn wadooyinka Muqdisho, kadib markii uu maray jid-cadde ka baxsan wadada weyn, oo hore ciid loogu xiray.

Ciidamo boolis ah oo Isgoyska Difgeer ku baara baabuurta ayaa arkay Gaari oo muraayado madow leh oo mudo dhowr daqiiqo ah yaalla goobta, kadibna waxay ku wargeliyeen dadweynaha inay ka fogaadaan.

Lama oga in qof uu ku dhex-jiray Gaariga qarxay, waxaana saraakiisha booliska ay sheegeen inay fashiliyeen qaraxa, iyagoo aan fahfaahin ka bixin in darawalka uu baxsaday in iyo uu ku dhintay qaraxa.

Wariyaha Garowe Online ee Muqdisho ayaa soo sheegaya in qaraxa uu burbur gaarsiiyay dhismooyinka ganacsi iyo kuwa shacab ay deganaayeen oo ku dhaw halka uu qaariga ku qarxay, oo hadda xiran.

Wali ma jirto cid sheegatay mas'uuliyadda qaraxa, balse Kooxda Al-Shabaab ayaa inta badan weeraro loo adeegsado baabuurta lagu soo xiro walxaha qarxa ka fulisa magaaladda Muqdisho.

GAROWE ONLINE