Qaraxyo laga maqlay Muqdisho iyo wararkii ugu dambeeyay

MUQDISHO, Soomaaliya - Qaraxyo culus ayaa laga maqlay duhurnimadii maanta oo Khamiis ah gudaha magaalada Muqdisho, kadib markii tiro hoobiyaal ah ay ku dhaceen xaafaddo katirsan degmooyinka Yaaqshiid iyo Wardhigleey ee gobolka Banaadir.

Illaa 6 Hoobiye-yaal ah ayaa ku dhacay nawaaxiga Stadium Muqdisho, oo ay degan yihiin Ciidamada AMISOM, Isgoyska Baar Ayaan iyo Xaafaddo ku dhaw, iyadoo ay geesteen khasaarooyin kala duwan, sida ay Warsidaha Garowe Online u sheegeen Goob-joogiyaal.

Inta la xaqiijiyay 7 qof oo shacab ah, oo caruur ay ku jiraan ayaa ku dhaawacmay hoobiye ku habsaday Makhaayado ku yaalla Isgoyska Baar Ayaan, kuwaasi oo la dhigay Isbtaallo kuu yaalla magaalada Muqdisho.

Saraakiisha Amaanka dowladda Federaalka ayaa sheegay inay baarayaan halka laga soo tuurey Hoobiyaasha maanta lagu garaacay qeybo kamid ah Caasimadda, oo 6 maalmood kahor ay ka dhaceen qaraxyo ay ku dhimatay ugu yaraan 45 qof.

Hoobiyaashan iyo kuwii ka horeeyay ayaa la rumaysan yahay in isla gudaha Muqdisho laga soo tuurayo, waxaana illaa hadda dowladda awoodi waysay inay kahor tagto weeraradan maadaama ay maamusho guud ahaan magaalada.

Al-Shabaab ayaa wixii ka dambeeyay magacaabista Taliye-yaasha NISA iyo Booliska kordhisay weerarada Muqdisho oo aan ka dhicin qarax islamarkaana ahayd mid xasiloon mudadii afarta bilood ee hogaan la'aan ahaayeen Hay'adaha amniga.

GAROWE ONLINE