QM oo Go’aamisay Mustaqbalka Howlgalka ATMIS ee Soomaaliya

New York, Agoosto 17, 2024 - Golaha Ammaanka ee Qaramada Midoobay ayaa Khamiistii cod aqlabiyad leh ku ansixiyay in Midowga Afrika uu sii wado howlgalka nabad ilaalinta ee Soomaaliya ilaa dhammaadka sannadka, iyagoo sidoo kale ku baaqay qorshe lagu dejinayo howlgallo cusub oo lagu wareejinayo ammaanka dalka Soomaaliya.

Qaraarka ay Britain ka dambeysay ee Golaha Ammaanka ayaa u ogolaanaya Midowga Afrika in uu sii wado hawlgalka kala guurka ee nabad ilaalinta ee loo yaqaan ATMIS, iyadoo la ogolaanayo in la geeyo ilaa 12,626 askari oo hubeysan, oo ay ku jiraan 1,040 booliis ah, ilaa 31-ka Diseembar. Waxa kale oo uu qaraarku codsanayaa in howlgallada ATMIS ay helaan taageero dhanka sahayda ah oo ay bixiso ergada siyaasadeed ee Qaramada Midoobay ee Soomaaliya.

Safiir ku xigeenka Ingiriiska ee Qaramada Midoobay, James Kariuki, ayaa sheegay in qaraarkani uu ku soo aaday waqti muhiim ah oo ku saabsan kala guurka amniga Soomaaliya.

“ATMIS waxay soo afjarmi doontaa dhammaadka sannadka, waxaana Golaha Ammaanka ee Midowga Afrika uu oggolaaday in la sameeyo howlgal beddelka ATMIS,” ayuu yiri.

Golaha Ammaanka ee Qaramada Midoobay ayaa soo dhaweeyay war-murtiyeedkii ka soo baxay Golaha Ammaanka ee Midowga Afrika ee 1-dii Agoosto, kaas oo soo jeedinaya in la dejiyo howlgal nabad ilaalin oo cusub oo uu hoggaaminayo Midowga Afrika si uu u beddelo ATMIS.

Qaraarku waxa uu codsanayaa in xoghayaha guud ee Qaramada Midoobay, António Guterres, iyo madaxa Guddiga Midowga Afrika, iyagoo la tashanaya dowladda Soomaaliya iyo dhinacyada caalamiga ah, ay Golaha Ammaanka u soo gudbiyaan warbixin ku saabsan qaabeynta howlgalka beddelka ATMIS ka hor 15-ka Nofeembar.

Mid ka mid ah arrimaha ugu muhiimsan ee lagu xusay qaraarka ayaa ah maalgelinta howlgalka cusub, waxaana loo baahan yahay in la helo warbixin ku saabsan kharashaadka iyo ilo-dhaqaale ee loo baahan yahay, ka hor 11-ka Oktoobar.

Si loo xoojiyo kala guurka amniga, qaraarku waxa uu ku boorinayaa Soomaaliya in ay sii wado horumarinta iyo hirgelinta Qorshaha Horumarinta Waaxda Amniga si dalka uu ugu dambeyntii ula wareego mas’uuliyadda iyo lahaanshaha amnigiisa.

Dalka Soomaaliya ayaa waxaa ka dhacey dagaal sokeeye ka dib markii dagaal-oogayaal qabaa’il ku saleysan ay rideen kaligii taliye Maxamed Siyaad Barre 1991-kii. Dalalka Geeska Afrika ayaa dib u dejiyay dowlad kumeel-gaar ah oo shaqeynaysa sanadkii 2012, tan iyo waqtigaasna waxay ku howlan yihiin dib u soo celinta xasilloonida iyaga oo wajahaya weerarro ka imanaya kooxaha xagjirka ah iyo burcad badeedda sii kordhaysa.

GAROWE ONLINE