Sidee beesha caalamka uga hadashay weerarkii Al-Shabaab ee Muqdisho?
-
Wariyaha Muqdisho GAROWE ONLINE
- Posted On 02-03-2019, 11:45AM
MUQDISHO, Soomaaliya - Sida looga bartey, beesha caalamka ayaa cambaareysay weerarkii dhimashada badnaa ee ka dhacay magaaladda Muqdisho, gaar ahaan wadada Makka Al-Mukarama.
Qaramada Midoobey: Xoghayaha Guud ee UN-ka António Guterres ayaa ugu baaqey shacabka Soomaaliyeed inaysan ka niyad-jebin weerarada Al-Shabaab dib u dhiska dalkooda iyo hiigsiga mustaqbalka wanaagsan iyo Soomaaliya oo nabad ah.
Turkiga: War kasoo baxay Wasaaradd Arrimaha dibadda ayaa lagu cambaareeyay weerarka Muqdisho, waxaana tacsi loo diray eheladda kuwii lagu dilay, iyaadoo caafimaad deg deg ah u rajeysay dadka ku dhaawacmay.
Sacuudiga: Sarkaal u hadlay Wasaaradda arrimaha dibadda ayaa sheegay in boqortooyadda ay si kulul u cambaareynayso qaraxyadii saddexda ahaa, ee ka dhacay Muqdisho, kuwaasoo lagu dilay 30 qof, ku dhawaad 100 kalena lagu dhaawacay.
Midowga Africa: Wakiilka AU ee Soomaaliya, Francisco Madeira ayaa sheegay in weerarka uu muujinayo sida Al-Shabaab uga naxeynin nolosha shacabka, iyadoo ujeedkiisuna yahay in lagu xagal-daaciyo degaallada lagu nabadeynayo Soomaaliya.
Mareykanka: Qoraal kasoo baxay Safaaradda Mareykanka ee Soomaaliya ayaa lagu cambaareeyay weerarka, iyadoo lagu amaaninay ciidamada amniga dowladda sida ay uga falceliyeen.
Halkan ka akhriso qoraalka Safaaradda:
Dowladaha Qatar iyo Sudan ayaa kamid ah dalalka cambaareeyay weerarka, iyadoo midnimo iyo taageero u balan-qaadey dowladda Federaalka iyo Shacabkeeda.
GAROWE ONLINE
