Soomaaliya iyo Ciraaq oo ka shiray cusbooneysiinta xiriirka ka dhaxeeya

Wasiirka koowaad ee Soomaaliya ayaa sidoo kale waxa uu ka warbixiyay "guulaha ay gaartey xukuumadiisa".

MUQDISHO, Soomaaliya - Ra’iisul Wasaare Xamsa Cabdi Barre, oo ku guda jira booqashada rasmiga ah ee uu ku joogo Baqdaad, ayaa maanta kulan la qaatay Guddoomiyaha Baarlamaanka Ciraaq, Muxsin Al-Mandalawi.

Xamse iyo Al-Mandalawi ayaa si guud uga wada hadlay xoojinta cilaaqaadka u dhaxeeya labada waddan iyo sidii ay Soomaaliya iyo Ciraaq ay u cusbooneysiin lahaayeen iskaashiga dhinacyada kala duwan ee ka dhaxeyn jiray labada dowladood iyo shacab.

Wasiirka koowaad ee Soomaaliya ayaa ka warbixiyay guulaha la taaban karo ee Soomaaliya ay ka gaartay dhinacyada amniga iyo dagaalka Khawaarijta, dhaqaalaha, horumarinta arrimaha bulshada iyo diblomaasiyadda.

GAROWE ONLINE