Talyaaniga oo xayiraad dhanka fiisaha kusoo rogay Soomaaliya

Warkan ayaa lagu shaaciyay bogga X safaaradda Talyaaniga ku leedahay magaaladda Nairobi.

MUQDISHO, Soomaaliya - Dowladda Talyaaniga ayaa ku dhawaaqday in si deg deg ah ay u joojisay qabanqaabada fiisaha Schengen ee codsiyada laga soo gudbiyay safaaradda ay ku leedahay magaalada Muqdisho ee Soomaaliya.

Warkan ayaa lagu shaaciyay bogga X safaaradda Talyaaniga ee Nairobi, waxayna tiri: "Fadlan waxaa la ogaysiinayaa in safaaradda Talyaaniga ee Nairobi ay joojisay soo saarista fiisaha Schengen ee dhammaan codsiyadaas oo ay qabanqaabisay safaaradda Talyaaniga ee Muqdisho, fadlan la xiriir safaaradda Talyaaniga ee Nairobi".

Inkastoo aan si rasmi ah loo sheegin sababta rasmiga ah ee ka danbeysa joojintan, hadana talaabadan ayaa timid kadib markii gudiga Midowga Yurub uu soo jeediyay xayiraad cusub oo dhanka fiisaha ah oo lagu soo rogay Soomaaliya bishii July 2024.

Soo jeedinta Midowga Yurub ayaa looga gol leeyahay in la kordhiyo wadashaqeynta Soomaaliya ee dib u soo celinta muwaadiniinta Soomaaliyeed ee ka gudbay ama galay Midowga Yurub iyada oo aan lahayn dukumeenti sax ah.

Hindisahan, ayaa la sugayaa inuu ansixiyo golaha Midowga Yurub, waxaana la doonayaa in muwaadiniinta Soomaaliyeed la siiyo dal-ku-gal keli ah, lana kordhiyo kharashka fiisaha, iyo in la kordhiyo wakhtiga codsiga oo ah 15 ilaa 45 maalmood.

Intaa waxaa dheer, Midowga Yurub waxaa laga yaabaa inuu hakiyo xeerarka qaarkood ee u baahan soo gudbinta dukumeentiyada taageeraya codsiyada fiisaha.

GAROWE ONLINE