Waa Kuma Gudoomiyaha cusub ee Maxkamada Sare Soomaaliya?

MUQDISHO, Soomaaliya - Digreeto kasoo baxday xafiiska Madaxweyne Farmaajo ayaa maanta loogu magacaabo Baashe Yuusuf Axmed xilka Gudoomiyaha Maxkamada sare ee dalka.

Xilkan waxaa laga qaaday Ibraahim Iidle Suleymaan, iyadoo sababta lagu sheegay kadib cabashooyin ay kasoo gudbiyeen Shacabka Soomaaliyeed, islamarkaana ay qayb ka tahay dib u haybeynta nidaamka garsoorka [Halkan ka akhri Warka].

Sikastaba, baaritaan uu sameeyay Warsidaha Garowe Online, wuxuu kusoo ogaaday in shaqsiga cusub ee loo magacaabay gudoomiyaha maxkamada sare ee dalka uu hadda yahay Agaasimihii Xarunta dhexe ee Xisbiga Wadani, ee maamulka Somaliland.

Baashe oo deegaan ahaan kasoo jeeda degmada Seylac ee Somaliland, ayaa sidoo kale soo noqday Agaasimihii Wasaaradda Shaqada iyo arimaha Bulshada Xukuumadii Madaxweyne Siilaanyo kahor inta uusan ku biirin Xisbiga mucaaradka Waddani.

Ma cadda hadii uu iska casilay xilka uu ka hayey Xisbiga Waddani, laakiin illo xog ogaal ah ayaa u xaqiijiyay GO in uusan wali iska xasilin xilka, mana jiro illaa iyo hadda mas'uul ka tirsan Xisbiga Waddani oo ka hadlay.

Ma ahan markii ugu horeysay oo siyaasi kasoo jeeda Somaliland looga magacaabo xil dowlada Federaalka, iyadoo ay xusid mudan tahay in shaqsigii lagu bedalay Baashe ee Ibraahim Suleymaan uu soo noqday Gudoomiyihii Maxkamada sare ee Somaliland.

GAROWE ONLINE