Caalamka oo qaadacay muddo kororsiga baarlamaanka Somaliland

HARGEYSA, Somaliland – Saaxiibadda Beesha Caalamka oo Talaadada maanta ah qoraal wadajir ah soo saarey ayaa si cad waxay uga hor-yimaadeen muddo kororsiga baarlamaanka Somaliland.

War-murtiyeedka kasoo baxay Beesha Caalamka ayaa sidoo kale waxaa lagu sheegay in arrintaan ay wiiqeyso dimoqraadiyadda maamulka gooni u goosadka ah.

Daneeyeyaasha ayaa waxay ku baaqeen in la dhaqan-geliyo heshiiskii ay xisbiyadda kala saxiixdeen bishii July ee sanadkan 2019-ka.

Heshiiskaas ayaa wuxuu dhigayaa in ay qabsoonto doorashadda goleyaasha degaanka iyo baarlamaanka oo muddo lix jeer dib loo dhigay.

Dhincyadda siyaasadda Somaliland ayay ku booriyeen in is-afgarad loo dhan yahay ay ka gaaraan doorashadda, iyaga oo ka digay dib u dhac kale.

Geesta kale, bayaanka ayaa waxaa walaac looga muujiyey xariga siyaasiyiinta mucaaradka iyo xayiraadda la saarayo xorriyadda hadalka.

Guddiga is-xilqaamay ee isugu jira siyaasiyiinta iyo ganacstadda si loo qaboojiyo xiisadda ayaa war-saxaafadeedka lagu bogaadiyey.

"Kaliya hay'addo adag oo si dimoqoraadi ah loo doortay ayaa dadka Somaliland siin kara horumarka ay u baahan yihiin," ayey sheegeen.

Waxay ku dareen: "Tani waa waxa Beesha Caalamka ay ka fileyso in ay ka timaado wada shaqeynta ay la leedaay Somaliland".

War-saxaafadeedka ayaa waxaa ku saxiixnaa dhinacyadda kala ah;

Qaramadda Midoobay, IGAD, Midowga Yurub, Mareykanka, Jarmalka, Ingiriiska, Norway Ireland, Belgium, Sweden, Denmark, The Netherlands, Finland, France, Talyaaniga, Greece iyo Switzerland.

GAROWE ONLINE