​Madaarka Hargaysa oo laga mamnuucay soo dhaweynta

HARGEYSA- Wasaaradda duulista hawada iyo gaadiidka cirka Somaliland, ayaa shaacisay inay gebi ahaanba joojisay soo dhaweynihii sii gelbintii masuuliyiinta xilalka kala duwan haysa ee loogu samayn jirey madaarka caasimadda Hargaysa, isla-markaana wixii haatan ka dambeeya aan cidna laga ogolayn dad daba socda.

Shir jaraa’id oo masuuliyiinta wasaaradda duulista oo uu hoggaaminayo wasiir Cumar Maxamed Faarax ku qabteen barxadda hore ee garoonka ayey ku shaaciyeen inay la-tashi dheer oo ay madaxweyne Siilaanyo la qaateen kadib, go’aansadeen inay joojiyaan soo dhaweynaha iyo sii gelbinta masuuliyiinta kala duwan oo uu madaxweynuhu ku jiro, iyagoo sababtana ku sheegay xaalad ammaan.

Masuuliyiintu waxa ay carrabka ku adkeeyeen tirada dadka madaxda madaarka isticmaalaysa daba yaacdaa ka badan tahay awooddooda baariseed, isla-markaana ay garwaaqsadeen in arrintaas lasoo afjaro si looga hortago amaan xumo garoonka ka dhaca ama ku timaadda madaxda garoonka isticmaalaysa.

Waxay sidoo kale masuuliyiinta wasaaraddu farriin u direen madaxda kala duwan ee Somaliland, taasoo ku aadan arrinta soo dhaweynta, waxayna u sheegeen inay ku qabsadaan xaafadahooda.

Dhawaan ayey ahayd markii madaxweyne Axmed Maxamed Maxamud "Siilaanyo" iyo xubno wafti ah kasoo degeen garoonka Cigaal International Airport, kuwaas oo garoonka dhexdiisa wax soo dhaweyn ah loogu samayn, isla-markaana saxaafadda kula hadlay xarunta aqalka madaxtooyada, iyadoo taasi gogol-xaar u ahayd tallaabada haatan la shaaciyey ee lagu joojiyey soo dhaweynihii garoonka dhexdiisa iyo waliba saxaafaddii lagula hadli jirey.

GAROWEONLINE