Somaliland ee shaacisay mowqifkeeda ku aadan mashruuca Baxnaano

HARGEYSA, Somaliland - Maamulka Somaliland ayaa Beesha Caalamka u diray warqad uu ku caddeynayo mowqifkiisa ku aadan mashruuca Baxnaano ee madaxweyne Farmaajo ka daahfuray Muqdisho.

Sidda ku xusan qoraalka, xukuumada Muuse Biixi ayaa u aragta barnaamijkaas "faragelin qaawan oo lagu waxyeeleeynayo amniga degaanada Somaliland laguna marin-habaabinayo caalamka".

Dowladda Soomaaliya ayuu kaga digay "isku dayga taagta daran ee ku dooneyso in ay ku farageliso 'madax-banaanida' Somaliland kana waantowdo xuduudaha caalwaaga ah ee Somaliland".

Baanka Aduunka ayay ka codsadeen in uu ka fiirsado kaalmada uu siiyo xukuumadda Muqdisho "taas oo ay u adeegsata ujeedooyin gaar ah iyo kuwa siyaasadeed oo lagu khalkhalgelinayo Somaliland".

Qoraalka oo kasoo baxay Wasaaradda Arrimaha Dibadda maamulka gooni-u-goosadka ah ayaa digniin loogu diray cid kasta oo qeyb ka noqota fulinta mashaariicda ka hor-imaanaya qadiyadda Somaliland.

Hadalkaan ayaa kusoo aadaya xilli warar soo baxaya ay sheegayeen in degaanada laga fulin doono mashruuca ay ku jiraan qeybo kamid ah Somaliland si gaar ahn Sool, Sanaag iyo Ceyn.

Goboladaas dhaca waqoyga Soomaaliya waxaa isku haya gacan ku hayntooda maamulada Puntland iyo Somaliland, waxaana dhowr jeer ku dhexmaray dagaalo sababay dhimasho iyo dhaawaca Rayid.

QORAALKA SOMALILAND

GAROWE ONLINE