Somaliland oo hanjabaad u dirtay Ergada Muqdishu ku sugan

HARGAYSA, Somaliland- Maamulka Somaliland, ayaa sheegay inuusan waxba iska badalin xeerkoodii hore ee ay kula macaamili jireen xubnaha ay u arkaan inuu ku dhex jiro Siyaasadda Somalia, waxayna hadda si toos ah fariin ugu direen xubnaha wax dooranaya ee ku sugan magaalada Muqdishu caasumadda Somalia.

Wasiiru dowlaha amniga ee wasaaradda Arrimaha Gudaha Somaliland Max’ed Muuse Diiriye, ayaa sheegay in Siyaasiyiinta Muqdishu ku sugan ee doorashada Soomaaliya ka qeybgalaya aysan matalin sidaa darteedna yihiin shakhsiyaad dalka dibaddiisa u shaqo tagay.

Diiriye, ayaa xusay in Somaliland waxba ka galin doorashooyinka socda, wuxuu cadeeyay inaysan ogayn odoyaal dhaqameed ka tagay Hargaysa kuwaasoo wax kusoo dooranaya magaalada Muqdishu, wuxuuna ugu goodiyay inay xasbiga dhigi doonaan dhammaan cid kasta oo doorashadaas ka qayb qaadata.

Hanjabaadan ayaa timid xilli maamulkaas uu sheegto inuu ka goostay Somalia inteeda kale islmarkaana ay yihiin waddan madax bannaan oo Somaliland la yiraahdo.

Balse, wali ma aysan helin aqoonsi caalami ah tan iyo wixii ka dambeeyay burburkii dowladdii dhexe ee Somalia.

GAROWEONLINE