Somaliland oo iska-fogeysay tirokoob ay daahfurtey Soomaaliya

Hargeysa ayaa tan iyo 1991-dii waxay sheegataa in ay ka madax-banaan tahay Muqdisho inteeda kale.

HARGEYSA, Somaliland - Maamulka Somaliland ayaa qashinka ku daray tirokoob ay daahfurtey dowladda Soomaaliya taasoo ay soo diyaarisay Wasaaradda Qorsheynta xukuumadda federaalka ah.

War-saxaafadeed kasoo baxay Golaha Wasiirada maamulka Hargeysa ayaa lagu caddeeyay in aysan qeyb ka ahayn tirokoobkan maadaama "aan kasii horeyna jiritaanka Soomaaliya".

"Sidaa darteed, Jamhuuriyadda Somaliland iyo Xuduudaheedu waxay u jiraan si sharci ah (de jure)," ayaa lagu yiri bayaankan oo lagu faafiyey ciwaanka Facebook-ga ee xafiiska warfaafinta Madaxtooyada Somaliland.

Qoraalka ayaa la raaciyey "Waa in Hay’adaha Dawladda [Somaliland] ay fuliyaan Qorshaha Horumarinta Qaranka ee 3aad (NDP3)" taasoo ka dhigan in aysan ku dhaqmin karin tirokoobka dowladda Soomaaliya.

Somaliland ayaa tan iyo 1991-dii waxay sheegataa in ay ka madax-banaan tahay Soomaaliya inteeda kale, hase ahaatee, illaa haatan ma aysan helin wax aqoonsi caalami ah.

Beesha Caalamka ayaa ula dhaqanta maamulka Hargeysa sidda maamul goboleed hoostaga xukuumadda Muqdisho halkaasoo loosoo mariyo mashaariicda caalamiga ah kahor inta aan loo dirin.

Madaxwayne Xasan Sheekh Maxamuud ayaa tan iyo markii dib loo doortry 15-kii May waxa uu caddeeyay in uu wadaxaajood toos ah la galayo Somaliland balse wuxuu meesha ka saarey kala go'itaan.

GAROWE ONLINE