Somaliland oo joojisay xuska 18 May ee Sannadkan
-
- Posted On 03-05-2017, 02:01PM
HARGAYSA, Somaliland- Maamulka Somaliland ayaa ku dhawaaqay inuu hakiyay sannadkan fantisiyihii lagu xusi jiray 18 May oo ah markii uu maamulkaasi ka go’ay Somalia inteeda kale.
Wasiirka wasaaradda Warfaafinta Somaliland, Cusmaan Cabdullaahi Saxardiid (Caddaani), ayaa warbaahinta u sheegay in xukuumaddu joojisay in loo dabaal dago 18 May dal iyo dibad ba.
Sababta ayuu ku sheegay abaaraha ka jira deegaanada Somaliland, wuxuuna cadeeyay in kharashaadkii ku bixi jiray munaasabadahaas loo wareejiyay dhinaca Gurmadka abaaraha.
Qurba joogta iyo waliba dadka kale ee dhigi jiray dabaal dagyada lagu maamuusayo maalintan ku salaysan gooni isu taagga Somaliland, ayuu wasiir Caddaani usoo jeediyay inay u badalaan dhinaca taakulada dadka abaaraysan.
Wuxuu ugu baaqay inay ka shaqeeyaan sidii Qaaraan loogu aruurin lahaa dadka dhiban ee wali abaartu ku hayso qaybo kamid ah Somaliland.
Golaha Xukuumadda ayaa ku kala aragti duwanaa muddooyinkii dambe Arrimaha ku saabsan xuskan, waxaana Madaxweyne Siilaanyo uu soo bandhigay in la joojiyo halka golaha qaybtood ay kasoo horjeesteen.
Balse Xukuumadda Somaliland ayaa isku raacday in la joojiyo xuska si wax looga qabto abaaraha ka jira deegaanada maamulkaas.
Xuskan in la qabto ayaa bilowday kadib markii 1991 Somaliland qaadatay go’aan ay kaga baxday Somalia.
GAROWEONLINE
