Somaliland oo soo saartey go'aan ka dhan ah Muqdisho xili ay xiisad jirto

HARGEYSA, Somaliland – Somaliland ayaa waxay shaaca ka qaadey in ay hakisay daawooyinka uga imaan jiray Muqdisho, caasimadda dalka Soomaaliya.

Hay'adda Hubinta Tayadda Wax-soo-saarka ayaa sheegtay in daawooyinka ka yimaada Muqdisho "aysan ku habooneyn nolosha bini'aadamka".

Gudoomiyaha Hay'addaas, Muuse Xasan Yuusuf, ayaa hoosta ka xariiqay in go'aankan ay qaateen kadib markii ay qabteen "daawooyin dhacay".

Ganacsatada daawooyinka kasoo iibsada Muqdisho ayaa laga doonayaan in ay la yimaadaan caddeymo muujinaya tayada badeecadooda, siduu xusay.

"Ma aysan gaarin heerkii mamnuucista, laakiin waxaan uga baahan nahay in ay la yimaadaan waxyaabaha hay'addu u baahan tahay," ayuu ku daray.

Gudoomiye Muuse oo warbaahinta la hadlay ayaa ku booriyey ganacsatadda in ay kala shaqeeyaan hay'adda sidii ay u gudan lahayd waajibaadkeeda.

Sikastaba, Hay'adda Hubinta Tayadda Wax-soo-saarka ayaa xarumo ku leh xuduudaha iyo garoomada, halkaasoo ay ku hubiso badeecadaha kala duwan.

Go'aankan ayaa kusoo aadaya xili ay jirto xiisad ku saabsan wada-hadalada Dowladda Federaalka iyo Somaliland oo hakad ku jira shantii sano ee lasoo dhaafay.

GAROWE ONLINE