Somaliland: Siilaanyo oo dilka ciidamada ka hadlay
-
- Posted On 02-02-2016, 08:23PM
HARGAYSA- Madaxweynaha Somaliland Axmed Maxamed Maxamuud(Siilaanyo), ayaa ka hadlay dilalka saraakiisha ciidamada kala duwan ay u geysanayaan askarta ay xukumaan, taas oo beryahan dambe noqotay caado lagu dhex arkay ciidanka Somaliland.
Madaxweynaha oo ka qaybgalay munaasabad loo sameeyey sanad-guurada 22-aad ee ciidamada Somaliland taasoo lagu qabtay taliska degmada Oog ee gobolka Sool, ayaa tilmaamay in cidkasta oo dilka saraakiisha ciidanka ku lug yeelata sharciga la horgeyn doono.
"Beryahan danbe waxa soo batay dilalka Ciidanka dhexdiisa, gaar ahaan dilka Saraakiisha... Arrintani waa denbi iyo dhaqan fool xun oo aan loo dulqaadan karin, waxaan u cadaynayaa in cid kasta oo geysata dil sharci-darro ah in cadaaladda la horkeeni doono, cawaaqibka ay leedahayna la dhadhansiin doono,” Ayuu yidhi Madaxweyne Siilaanyo.
Madaxweynaha oo hadalkiisa sii wata, ayaa waxa uu caddeeyey inuu dhawaan magacaabi doono guddi daba-gal ku samaya sababta askartu u dilayaan taliyayaashooda.
Hadalka Siilaanyo ayaa kusoo beegmay xilli muddooyinkii dambe soo badanayeen dilalka saraakiisha ciidamada horjoogayaasha u yihihiin u gaysanayaan.
GAROWEONLINE
