Xarun boolis oo laga dhisayo Somaliland
-
- Posted On 20-01-2016, 10:32PM
HARGEYSA- Madaxweynaha Somaliland Axmed Maxamed Maxamuud (Siilanyo) ayaa dhagax dhigay dhisme cusub oo ay yeelaan doonaan taliska guud ee ciidamada booliska, taas oo ay maalgelisay dawaldda Ingiriiska.
Munaasabad kooban oo dhismahan lagu dhagax dhigayey ayaa lagu qabtay xarunta taliska ciidamada Booliska Somaliland waxana hadalo kooban ka jeediyey taliyaha guud ee booliska Somaliland Cabdilaahi Fadal Iimaan, Wasiirka Arrimaha gudaha Cali Waran-cadde iyo waliba sarkaal sare oo katirsan Hay’adda DFID kuwaasoo faahfaahin ka bixiyey muhiimadda dhismahani yeelan doono iyo sida uu wax badan uga dabooli doono baahida ciidamada booliska Somaliland qabaan.
Xaruntan la dhagax dhigay ayaa wax ka dhisan dhisme qadiimi ah oo dawladda Ingiriisku dhistay sanadkii 1936 waxana lagu beddeli doonaa mid casri ah oo dabaqyo ka kooban kaas oo yeelan doona waxyaabo badan oo ciidamada booliska iyo ammaanka saraakiisha muhiim u ah.
Dawladda ingiriiska ayaa si weyn Somalilnad uga caawinta dhinaca ciidamada, waxana marka laga tago dhismayaasha iyo siisaa tababarro joogto ah ciidamada RRD oo loogu talo galay argagixiso la dirirka.
GAROWEONLINE
