Farmaajo iyo Khayre oo hambalyo u diray Madaxweynaha cusub ee Puntland

MUQDISHO, Somalia - Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa hambalyo u diray Madaxweynaha iyo Madaxweyne K/Xigeenka cusub ee Dowlad Goboleedka Puntland Mudane Siciid Cabdullaahi Maxamed (Deni) iyo Mudane Axmed Cilmi Cismaan (Karaash) oo maanta ku guuleystay doorashadii ka qabsoontay Puntland.

“Waxaan Madaxweynaha cusub ee Puntland Mudane Siciid Deni iyo K/xigeenkiisa Mudane Axmed Karaash ugu hambalyeynayaa xilalka loo doortay, anigoo xasuusinaya yididdiilada bulshada Puntland ee ku aaddan in ay deegaannadaas u horseedaan amni, caddaalad iyo horumar.”

Madaxweynaha ayaa ku bogaadiyey musharraxiintii xilka madaxtinnimo, Guddiga Doorashada iyo Golaha Wakiillada Puntland dadaalkii ay geliyeen sidii loo sii adkeyn lahaa dimuqraadiyadda qaan-gaarka ah ee ka jirta Puntland.

Madaxweynaha ayaa u rajeeyay shacabka iyo maamulka Puntland isbeddel miro-dhal ah oo horseeda xasillooni buuxda iyo horumar ay si wadajir ah ugu tallaabsadaan bulshada iyo dhammaan deegaannada Dowladda Goboleedka Puntland.

Madaxweyne Farmaajo ayaa Alle uga baryay Madaxweynaha cusub ee Puntland iyo K/Xigeenkiisa in ay ku guuleystaan gudashada waajibaadka culus ee loo igmaday.

Sidoo kale, Ra'iisul Wasaare Khayre ayaa hambalyo u diray Madaxweynaha cusub ee Puntland Mudane Saciid Cabdullaahi Maxamed Deni, isagoo ugu baaqey shacabka iyo mas'uuliyiinta Puntland inay la shaqeeyaan.

Mudadii ay socotay doorashadda Puntland, mas'uuliyiinta Villa Somalia iyo Wasiiradda Xukuumadda ayaa laga mamnuucay inay Garowe yimaadaan, iyadoo maamulkii hore ee Gaas ku sheegay tallaabadaas mid looga hortagayay faragelin doorasho.

GAROWE ONLINE