Aqalka Sare oo ansixiyey sharci ay qaadaceen maamulada

MUQDISHO, Soomaaliya – Mudaneyaasha Aqalka Sarre ee baarlamaanka federaalka Soomaaliya ayaa maanta oo Isniin ah kulan ku yeeshay Muqdisho.

Fadhiga oo ay kasoo qeybgaleen inta badan xubnaha golaha ayaa waxaa gudoomiyey afhayeenka Aqalka, Cabdi Xaashi Cabdullaahi.

Guddomiye ku-xigeenka 1aad, Abshir Maxamed Axmad, iyo xigeenka 2aad, Mowlid Xuseen Guhaad, ayaa qayb ka ahaa kulanka.

Ajendaha kulanka ayaa ahaa akhrinta 2aad ee Hindise-sharciyeedka Batroolka oo goluhu ka yeeshey dood dheer kahor inta uusan cod u qaadin.

Sidda uu ku dhawaaqay gudoonka, markii cod loo qaadey waxaa ogolaatay 24-Senator; waxaa diiday 4-Senator, ma jirin cid ka aamustay.

Bishii May, 2019, golaha shacabka ayaa meelmariyey xeerkan oo ay kasoo horjeesteen qaar kamid ah dowlad goboleedyadda waddanka.

Maamuladda diidey hindise sharciyeedkan ayaa cuskaday in aanan laga talagelin isla markaana ay ku jiraan qodobo qaar oo u baahan in laga heshiiyo.

GAROWE ONLINE