Afhayeenka baarlamaanka Jubbaland oo dib loogu doortay Kismaayo

KISMAAYO, Jubbaland – Xildhibaanadda labaad ee baarlamaanka Jubbaland ayaa maanta oo Sabti ah magaaladda Kismaayo ku doortay gudoomiye rasmi ah.

Xilkan oo ay u taagnaayeen laba mudane ayaa waxay kala ahaayeen Cabdi Maxamed Cabdiraxmaan iyo Xildhibaan Sheekh Xuseen Shiinow Cali.

Mudaneyaasha coddeynta ka qeybgashay oo tiradooda ay gaareysay 73 ayaa waxay badankooda ugu shubeen Sheekh Cabdi.

Guuleystaha oo ahaa gudoomiyihii hore ee Golaha Wakiiladda maamulkaasi afartii sano ee lasoo dhaafay ayaa waxa uu helay codad gaaraya 55.

Ninka lagu garaacay coddeynta ee Xuseen Shiinow Cali ayaa waxaa dhankiisa uu helay kalsoonida Xildhibaano gaaraya 18.

Afhayeenka cusub oo madasha ka hadlay kahor inta aan la dhaarin ayaa waxa uu u mahad-celiyay xubnaha doortay, isaga oo balanqaadey hufnaan shaqo.

Sharcidejiyaha laga badiyay oo dhankiisa aqbalay natiijadda kasoo baxday cod-bixinta ayaa wacad ku maray in uu la shaqeyn doono gudoomiyaha cusub.

Doorashaddan oo ay xigi doonto labadda ku xigeen ayaa waxaa kasii dambeysay coddeynta madaxweynaha oo 22-ka bishan loo muddeeyay.

GAROWE ONLINE