Kooxaha burcad badeeda Soomaalida oo markab ka afduubtay badda Carabta
-
GAROWE ONLINE XAFIISKA MUQDISHO
- Posted On 28-01-2024, 01:44PM
Colombo (GO) - Waaxda kalluumeysiga ee dalka Sri Lanka ayaa sheegtay in burcad badeed Soomaali ah ay gacanta ku dhigeen markab kalluumeysi oo ay saarnaayeen 6 shaqaale ah.
Agaasimaha guud ee waaxda kalluumeysiga Sri Lanka, Susantha Kahawata ayaa warbaahinta u sheegtay in doonida ay burcadka qafaasheen laga soo qabtay badda Carabta.
Markabkan kalluumeysiga ah ayaa ka shiraacday Sri Lanka 12-kii Janaayo, waxaana lagu afduubtay meel 1,160 nautical miles u jirta soohdinta badda ee Sri Lanka.
Ma jiro wax xiriir ah oo ay Maamulka Sri Lanka la sameeyeen markabka, waxaana xogta ku saabsan markabka laga helay maraakibta u dhaweyd.
Dowaldda Sri Lanka ayaa sidoo kale sheegtay in ay qaadayso tillaabooyin lagu soo deynayo markaba iyo kalluumeysatada la afduubtay.
GAROWE ONLINE
