Wafdi ka socda Qadar oo yimid Muqdisho [Sawirro]

MUQDISHO, Soomaaliya - Wafdi heerkiisu hooseeyo oo ka socda dowladda Qadar ayaa saaka oo Talaado ah soo gaarey magaalada Muqdisho, ee caasimadda Soomaaliya.

Wafdigan waxaa hogaaminaya Khalifa Jassim Al Kuwari oo ah Agaasimaha guud ee Sanduuqa dalka Qadar u qaabilsan horumarinta. Garoonka diyaardaha Muqdisho waxaa kusoo dhaweeyay Wasiirro katirsan dowladda Federaalka.

Wasiirka Qorsheynta Jamaal Maxamed Xassan, Wasiirka Amniga Maxamed Abuukar Islow iyo Wasiir kuxigeenka Arrimaha Dibadda Mukhtar Mahad Daa'uud ayaa u galbiyay Wafdiga dalka Qadar Villa Soomaaliya.

Mas'uuliyiintaan oo ka kooban 5 xubnood ayaa waxay xarunta Madaxtooyada kula kulmayaan Ra'iisul Wasaare Xasan Cali Khayre iyo madax kale oo ka tirsan Xafiiska Madaxweyne Farmaajo.

Ujeedka wafdiga Qadar u yimid Muqdisho ayaa la xiriira inay ka qeybgalaan xaflad ay dowladaha Qadar iyo Soomaaliya ku kala saxiixanayaan Mashaariic horumarineed, oo ay kamid yihiin dhisamaha Wadooyinka Muqdisho ku xira Afgooye iyo Jowhar.

Qadar ayaa sidoo kale dib u dayactir ku sameyn doono xaruumo dowladeed oo ku yaalla Muqdisho, tallaabadaasi oo lagu micneeyay inuu qeyb ka yahay tartanta Dooxa kula jirta dowladaha Imaaraadka iyo Sacuudiga oo Soomaaliya ku leh saameyn xooggan, islamarkaana uu kala dhaxeeyo xiriir taariikhi ah oo soo jireen ahaa.

Socdaalka Wafdiga Qadar ayaa kusoo beegmaya xilli dhawaan Madaxweyne Farmaajo uu booqasho ku tagey dalka Imaaraadka Carabta, oo kamid ah dalalka Khaliijka carabta ee xiriirka u jaray Dooxa June 5.

Agaasiimaha Villa Soomaaliya Fahad Yaasiin oo xiriir dhaw la leh Qadar ayaa la rumaysan yahay inuu ka shaqeynayo in dowladda Federaalka aysan xiriirka u jarin Doha, islamarkaana baaqi kusii ahaato go'aankeeda dhex-dhexaadka ah.

GAROWE ONLINE