Aabaha dhalay ra'iisul wasaaraha Itoobiya oo geeriyooday
-
WARIYAHA ADDIS ABABA GAROWE ONLINE
- Posted On 17-06-2019, 05:20PM
ADDIS ABABA, Ethiopia – Aabaha dhalay ra'iisul wasaaraha dalka Itoobiya, Abiy Axmed ayaa waxaa lagu waramayaa in Isniinta maanta ah uu geeriyooday.
Axmed Cali ayaa waxaa la sheegayaa in uu ku dhintay magaaladda Agaro Wereda oo ka tirsan Aaga Jimma Zone ee hoos-timaada is-maamul goboleedka Oromada.
Sidda uu shaaciyey Agarow Wereda, xafiiska warfaafinta gobolka, Marxuumka ayaa waxaa lagu aasi doonaa degaanka maalinta berri oo Talaado ah.
Xafiiska ma uusan fahfaahin sababta keentay dhimashadda Axmed, kaasi oo ahaa Oday waayeel isla markaana ahaa wadaad Muslim oo caan ah.
Sidda ku xusan taariikhaha laga diiwaan-geliyay Abiy Axmed, hooyadii, Tezeta Wolde oo horey geeriyootay waxay ahayd Masiixi bulshada Amxaarada kasoo jeeda.
Aabihii oo maanta dhintay ayaa guursadey Afar xaas. Abiy wuxuu ahaa cunuga 13aad ee Aabihii iyo midka lixaad iyo ubadka ugu da'da yar [Yaraanka] caruurta ay dhashay hooyadii.
GAROWE ONLINE
