Itoobiya oo qaadey talaabo dhaawacaysa dhaqaalaha Jabuuti

Istaraatiijiyadan cusub ayaa hoos u dhigtay ciriiriga waddooyinka Addis Ababa iyo Jabuuti.

ADDIS ABABA, Ethiopia - Itoobiya ayaa si weyn hoos ugu dhigtay tirada wax soo dejinta ee Dekedda Jabuuti iyada oo raadinaysa beddelka Geeska Afrika, taas oo u muuqata in ay tahay istaraatiijiyad lagu dhimayo ku tiirsanaanta hab-dhaqameedka wax soo dejinta iyo dhoofinta.

Sida ay sheegayaan wararka, xadiga Itoobiya ee wax kala soo degista Dekedda Jabuuti ayaa hoos u dhacay 14.62 boqolkiiba, waxaana si xiiso leh in loo wareejiyay dekedaha Tadjoura, Berbera iyo Mooyaale.

Istaraatiijiyadan cusub ayaa hoos u dhigtay ciriiriga waddooyinka Addis Ababa iyo Jabuuti, kaasoo ahaa marinka ugu weyn ee laga soo galo waddanka aan badda lahayn. In ka badan 95 boqolkiiba badeecadaha Itoobiya laga soo dejiyo waxaa laga soo rari jiray dekedda Jabuuti.

Waxayna tani, warbixino ka soo baxay Wasaaradda Gaadiidka iyo Saadka, ay ku sheegeen inay ku guulaysteen inay dalka u badbaadiyaan lacag ka badan 2.4 bilyan oo Birr tobankii bilood ee la soo dhaafay. Wasaaradda ayaa warbixintan siisey baarlamaanka federaalka toddobaadkan.

Muddadaas, halka 86 boqolkiiba wax soo dejinta Itoobiya lagu maamuli jiray dekedda Jabuuti, 9.16 boqolkiiba waxa lagu maamulayaa Tadjoura, boqolkiiba shan Berbera iyo 0.02 boqolkiiba Mooyaale. Dekadda Berbera ayaa ilaa hadda loo isticmaali jiray oo keliya hay’adda cunnada Adduunka ee WFP iyo shixnado badan.

Warbixinadu waxay muujinayaan in Djibouti oo leh in ka badan 7 dekedood oo waaweyn, ay ka qaalisan tahay dekeda Sudan, Massawa, Casab, Berbera, Muqdisho, Mombasa, Tanzania iyo Mozambique. Qiimo tartan ah ayaa lagu heli karaa iyadoo la isticmaalayo dekedahan la dhimay.

Talaabadan cusub ayaa loo badinayaa in ay saameyn ku yeelan doonto dhaqaalaha dibadda ka soo gala dalka Jabuuti oo muhiim u ah horumarka dalka.

Sidoo kale Itoobiya waxa ay hadda dhisaysaa waddo isku xidha dekedda Berbera ee Somaliland, taas oo saamayn ku sii yeelanaysa dhaqaalaha ka soo xarooda Jabuuti oo si weyn uga macaashtey in Itoobiya aysan lahayn wax bad ah kuna tiirsaneyd marsooyinkeeda mashquulka badan.

GAROWE ONLINE