Kenya oo raaligelin siisay dowladda federaalka Soomaaliya

Kenya ayaa mar kale xaqiijisay in ay aqoonsan tahay madax banaanida hal dowlad oo federaal ah oo Soomaaliyeed

NAIROBI, Kenya - Kenya ayaa u sheegtay Soomaaliya inay aad uga xuntahay “joogitaanka aan ku talagal ahayn ee aan munaasibka ahayn” ee calanka Somaliland ee munaasabad dublamaasiyadeed oo sanadle ah oo lagu qabto Nairobi.

Kenya ayaa mar kale xaqiijisay in ay aqoonsan tahay madax banaanida hal dowlad oo federaal ah oo Soomaaliyeed iyo hufnaanta qarannimada Soomaaliya ee federaalka ah.

Raali gelinta Kenya ayaa timid kadib markii Safiirka Soomaaliya Maxamed Tarsan uu ka baxay kulankan uu khudbad ka jeediyey Madaxweynaha Kenya Uhuru Kenyatta uuna si adag uga soo horjeestay joogitaanka wakiilka Somaliland.

Soomaaliya ayaa sheegtay in Kenya ay ku xad gudubtay madax banaanideeda, waxayna dalbatay in sharaxaad laga bixiyo. Somaliland waxay ku dhaliishay Tarsan inuu ka baxay.

Somaliland ayaa cambaareysay gadoodka dowladda federaalka Soomaaliya ka sameysay martiqaadka Kenya ugu fidisay shaqsi ka socdey maamulka Hargeysa kulan uu Uhuru Kenyatta kula hadlayay diblumaasiyiinta dalalka caalamka.

Xukuumadda Biixi waxay mowqifka Muqdisho ku qeexdey "cadowtinimo," sida laga soo xigtey warbaahinta oo soo xigatay sarkaal ka tirsan Waaxda arrimaha dibadda maamulka Hargeysa.

Somaliland ayaa tan iyo 1991-dii waxay sheegataa in ay ka madax-banaan tahay Soomaaliya inteeda kale balse wuxuu wali aduunka u aqoonsan yahay maamul goboleed si toos ah u hoostaga dowladda federaalka ee xarunteedu tahay Muqdisho

HOOS KA AHRISO QORAALKA KENYA

GAROWE ONLINE