Kenya oo shaacisay cidda kaga hiilineysa xiisadda Soomaaliya
-
WARIYAHA NAIROBI GAROWE ONLINE
- Posted On 30-06-2019, 08:21AM
NAIROBI, Kenya – Iyadda oo bisha September ee sanadkan dib loo bilaabayo dhageysiga dacwada kiiska xuduud badeedka ee Soomaaliya iyo Kenya ayey xukuumada Nairobi la timid dood horleh.
Doodan ayaa waxay isugu jirtaa eedeyn ay u jeedineyso dhinacyo kala duwan si lamid ah hanjabaad kahor inta aan lagu dhawaaqin xukuna kama dambeysta Maxkamada Cadaaladda Aduunka ee ICJ.
Monica Juma, wasiirka arrimaha dibada Kenya ayaa xustay in hay’addo ganacsi oo xiisaneynaya goobta la isku haysto ay la safteen Soomaaliya, iyaga oo eegaya danahooda, "taasi ay sii hurineyso xiisada".
"Tani waxay sababi kartaa in diirada la saari waayo dagaalka ka dhanka ah argagixisada iyo shurta badeeda," ayay ka tiri munaasabad ay kaga qeybgashay magaalada London, siduu baahiyey Daily Nation.
Mas'uulka ugu sareeya diblumaasiyada Kenya ayaa waxa aysan magacaabin shirkadaha caalamiga ah ee holaca kusii shidaya khilaafka kala dhaxeeya, balse waxay ku sifeysay "xubno ganacsi oo ajnabi ah".
Balse waxay mar sii horeysay saxaafada Kenya ay qortay in dowladood ay cabasho ka gudbineyso Norway iyo Ingiriiska oo ay ku dhaliishay in ay dhinac xig-sadeen isla markaana ay qeyb ka yihiin muranka.
Si lamid ah doodan waxay imaaneysaa iyadda oo shirkadaha shidaalka ee Shell iyo Exxon Mobil ay dhowaan la galeen xukuumada heshiisyo ku aadan in ay dib u bilaabaan howlgalkooda Soomaaliya.
Dowlada Federaalka Soomaaliya ayaa 2014-kii Kenya ka dacwaysey ICJ inkasta oo tan iyo xiligaasi ay Nairobi dalbaneysay in lasoo celiyo isla markaana wada hadal lagu dhaweeyo balse waa ay ku hungowday.
Dowladda uu hogaamiyo Uhuru Kenyatta ayaa codsi u qortay Qaramada Midoobay oo ku saabsan xiisada, kaasi oo ay ku dalbaneyso farogelin si loo qaboojiyo xiisada.
Dhamaan dhinacyadda ay dhaliilaha u jeedisay Kenya wali kama aysan jawaabin eedeyntaasi.
Mareykanka ayaa si lamid ah shaaciyey in uu ku lug-leeyahay xalinta is-qabqabsiga, isaga oo tibaaxay in uu ka shaqeynayo sidii is-fahan loo gaari lahaa, wallow xukuumada Muqdisho ay taasi horey u diidey.
GAROWE ONLINE
