Afey oo mar kale tagay Baladweyne

BALADWEYNE, Somalia- Wafdi uu hogaaminayo wakiilka Midowga Afrika ee Somalia Maxamed Cabdi Afey, ayaa maanta gaaray magaalada Baladweyne xarunta gobolka Hiiraan, isagoo kulamo la qaatay qaar kamid ah duubabka dhaqanka.

Wakiilka ayaa kulan albaabada loo xiray la qaatay Ugaas Xassan Ugaas Khaliif, waxayna kawada hadlayeen arrimo la xiriira dhismaha maamulka labada gobolka Hiiraan iyo Shabeellaha dhexe.

Warar madax bannaan oo shirkaasi ku xeeran ayaa sheegaya in labada dhinac aad uga doodayaan waxyaabaha lagu qancin karo bulshada gobolkaa si loo dhiso maamulkaasi, balse ilaa hadda ma jirto wax natiijo la gaaray.

Shirkan ayaa yimi maalmo uun kadib markii wafdi uu hogaaminayo Maxamed Cabdi Afey iyo General Gabre natiijo la'aan kaga laabteen kulan saacado badan socday oo ay la qaateen duub dhaqameedka gobolka Hiiraan.

Dhismaha maamulka labadaasi gobol ayaa muddo soo jiitamayay, waxaana hareeyay khilaaf ka yimi ergooyinka beelaha ka qayb galaya.

GAROWEONLINE