Al Shabaab oo dagaal kula wareegay deegaanka Muuri
-
- Posted On 16-10-2016, 10:42PM
MUURI, Somalia- Dagaalyahanno katirsan ururka Al Shabaab, ayaa galinkii dambe maanta dagaal dhiig ku daatay kula wareegay deegaanka Muuri, oo 13Km dhanka Galbeed uga beegan degmada Afgooye, ee gobolka Shabeellaha Hoose.
Qof kamid ah dadka deegaanka, ayaa u sheegay Warsidaha GO, in Al shabaab Labo Jiho ka weerartay deegaanka, waxayna tuuladaasi kula tagaallameen ciidamo katirsan dowladda Somalia, oo halkaasi fariisamo ku lahaa.
Wararka waxay sheegayaan in Al shabaab ay duqeyn xoogan oo Madaafiic ah ka geysteen deegaanka Muuri, kahor inta aysan la wareegin. Ciidamada dowladda ee laga soo saarey Muuri waxay gaareen Afgooye.
Wali lama oga Khasaaraha Dagaalka, oo ahaa mid aad u qaraar oo labada dhinac isku adeegsadeen hubka Culus, waxaana wararku ay xusayaan inay dhowr guri gubteen.
Deegaanka Muuri oo ku yaalla wadada isku xirta Afgooye iyo Shabalanbood, ayaa lagu soo waramayaa in guud ahaateed gacanta u gashay Al shabaab kadib markii ciidamada dowladda Somalia ka baxeen.
Al shabaab ayaa u muuqata inay kordhinaysay weerareeda mudooyinkan danbe, xilli dalka Somalia ka socoto Doorashada Baarlamaaniga ah, oo ka dhacayso caasimadaha maamula goboleedyada.
GAROWEONLINE
