Al Shabaab oo weerartay Kolonyo ay lasocdeen ciidamo socda Maraykanka
-
- Posted On 19-11-2016, 11:09AM
KISMAAYO, Somalia- Kolonyo military oo ay la socdeen Saraakiil ciidan oo u dhashay dalka Mareykanka ayaa lagu weeraray duleedka magaalada Kismaayo, ee xarunta gobolka Jubbada Hoose.
Wararka GO helayo ayaa sheegaya in Al Shabaab ay wadada u galeen Gaadiid ay wateen ciidamo isku dhaf ah oo kasocday Mareykanka, AMISOM iyo SNA xilli ay marayeen nawaaqiga deegaanka Buulo-Gaduud.
Weerarka ayaa dhaliyay Dagaalka saacado qaatey oo labada dhinac ku dhexmaray duleedka Buulo-Gaduud, waxaana wararku sheegayaan in Dagaalkaasi ka qeyb-qaateen Diyaarado Helicopters ah.
Al Shabaab ayaa sheegtay in weerarka ay ku dileen askar badan, sidoo kalena ay ku gubeen dhowr gaadiid oo kuwa dagaalka ah. Balse, Mareykanka iyo AMISOM kama aysan hadlin sheegashada Al Shabaab.
Militariga Mareykanka ayaa dhowr jeer weeraro ka fuliyay deegaanka Buulo-Gaduud, halkaasi oo ay ku dileen Bishii June Hogaamiyihii Al Shabaab u qaabilsanaa weerarada dalka Kenya iyo Gobolada Jubbooyinka Maxa'ed Kuno.
Taliska ciidamada Mareykanka ee Geeska Africa ayaa horey u sheegay in weerarada Somalia ka fuliyaan ay yihiin kuwa is-difaacid ah, sidoo kalena kaalintooda ay tahay oo kaliya la-talin iyo tababar.
Ciidamada Kenya ee qeybta ka ah AMISOM ayaa lagu dhaliiyay inaysan samaynin horumar dhanka dagaalka ka dhanka ah Al Shabaab tan iyo markii dalka ay soo galeen 2011.
GAROWEONLINE
