Al-shabaab oo sheegtay gacanta ku haynta askar Uganda u dhalatay
-
- Posted On 09-09-2015, 01:15PM
09 September, 2015(GO)-Urur Al-Shabaab ayaa sheegatay inay gacanta ku haysato askar u dhalatay dalka Uganda, kuwaas oo ay ku qabteen weerar ay dhawaan ku qaadeen deegaanka Jannaale.
Afhayeenka howlgallada milateriga Al-Shabaab Cabdicasiis Abu Muscab oo la hadlayay Idaacad ku hadasha afka kooxda Al-shabaab ayaa sheegay in weerarkii Jannaale ku soo qabteen askar nool una dhashay dalka Uganda.
Abu Muscab ma uusan sheegin tirada rasmiga ah ee askarta ay gacanta ku hayaan waxaana uu sheegay in dhawaan soo bandhigi doonaan Sawirrada iyo magacyadooda si loo xaqiiqsado sheegashada gacan ku haynta askartaasi.
Ilaa hadda dowladda Uganda kama aysan hadlin sheegashada Al-shabaab ee ah inay gacanta ku hayaan askar ka soo jeeda dalka Uganda.
Weerar ururka Al-shabaab ku qaadeen saldhig ciidamadamada Uganda ku lahaayeen deegaanka Jannaale, waxay sheegeen inay ku dileen ilaa 50 askari, halka Uganda ay beenisay oo sheegtay in laga diley 12 askari oo kaliya.
GAROWEONLINE
