AMISOM oo baaraysa dada ay u gaysteen dil
-
- Posted On 13-11-2016, 06:11PM
MUQDISHU, Somalia- Howlgalka Midowga Africa ee AMISOM, ayaa sheegay inuu baaritaan ku samayanayo wararka sheegaya in ciidamada Ethiopia ay dad shacab ah ku dileen gobolka Galgaduud, ee bartamaha dalka Soomaaliya.
AMISOM ayaa sheegtay in Wararka Warbaahinta ay tebiyeen uu yahay mid aan sal iyo raad lahayn, islamarkaana aysan jirin dad shacab ah, oo ciidamada Ethiopia ku dileen gobolka Galgaduud.
War kooban oo AMISOM soo gelisay Boggeeda Twitter-ka, ayaa lagu yiri, "Ciidamadeena waxay fashiliyeen weerar gaadmo ah, oo Al shabaab doonayeen inay ku qaadaan Kolonyo ay wateen duleedka magaalada Ceelbuur."
"Waan ka warhaynaa Warbaahinta Wararka ay sheegeen, balse kama warhayno Shacab ay Ciidankeena ku dileen gobolka Galgaduud," ayaa lagu sheegay Warka kasoo baxay Howlgalka AMISOM.
AMISOM waxa ay sheegtay in illaa hadda aysan caddeyn in dad rayid ah ay ku dhinteen dagaalkii dhex maray ayaga iyo al-Shabaab, sida warbixinada qaar ay sheegayaan.
AMISOM ayaa sheegtay in ciidankeeda ay sameeyaan Taxadir iyo feejignaan, xilliyada ay Howlgalka samaynayaan, sidoo kalena ka fogaadaan inay dhibaateeyaan dadka shacabka ah.
Warka AMISOM ayaa yimid maalmo kadib markii ciidamada Ethiopia ay 7 qof oo shacab ah ku dileen duleedka Wabxo iyo deegaanka Dac, iyagoo ka aargoosanayay Weeraro ay kala kulmeen Al shabaab.
AMISOM waxay sheegtay in Al shabaab ay kordhiyeen weerarada bilooyinkii lasoo dhaafey, si ay u afgenbiyaan dowladda Somalia, uguna soo dabaalaan dalka Somalia Xukunadooda adag.
GAROWEONLINE
