Badmaaxayaal kusoo caariyay Kismayo
-
- Posted On 27-06-2016, 06:03PM
KISMAYO, Somalia- Xeebaha magaalada magaalada Kismaayo, ayaa maanta waxaa ku soo caariyey doon ay wateen shan ruux badmaaxayaal u dhashay dalka Komoros, kuwaasi oo muddo 45 casho ah ku go'doonsanaa biyaha dushooda.
Taliyaha Ciidamada Booliska Gobbolka Jubbada Hoose Col. Xassan Kheyre Axmed, ayaa sheegay in dadkaan iyo doontii ay wateen ay haatan gacanta ku hayaan mooliska maamulka Jubbaland baaritaana lagu hayo.
Badmaaxiintan ayuu sheegay inay ka muuqato dhibaato aad u badan islamarkaana qaybtood aysan hadli karin, wuxuuna tilmaamay inay geeyeen goobo caafimaad si loogu dabiibo.
Khayre, oo la hadlayay VOA, ayaa xusay inaysan ilaa hadda hayn caddayn rasmi ah oo ku saabsan sheegashada nimanka ee dalka Komoros, balse wuxuu caddeeyay inay ka xumaatay doontii ay wateen sidaasi awgeed soo bad-baadisay doon kale oo kalluumaysi.
Dadkan ayaa waxaa ka muuqda rafaad xooggan, mana jirto xog ku saabsan meesha ay u socdeen iyo qorshahooda.
Dhawaan ayay ahayd markii nawaaxiga Kismayo lagu qabto Markab Kalluumaysi sharci darro ah, waxaana taliye Khayre uu sheegay inay ka hishiiyeen Jubbaland iyo dowladdii kasoo jeeday.
GAROWEONLINE
