Beesha Caalamka oo digniin kasoo saartay shirka 15-ka Febraayo

MUQDISHO, Soomaaliya - Saaxiibada caalamka ee Soomaaliya oo ka hadlay muranka ka taagan goobta uu ka dhacayo shirka uu Farmaajo iclaamiyey 15-ka Febraayo "aysan cudurdaar noqon karin".

"Saaxiibada caalamku ma aaminsana in su’aasha ku saabsan goobta shirka lagu qabanyo ay cudurdaar u noqoto dib-u-dhac kasta ee ku yimaada shir-madexeedkan muhiimka ah," ayay ku sheegeen qoraalka.

Madaxda Soomaalida ayay cod dheer ugu baaqeen in ay sii wadaan wadaxaajoodyadda isla markaana ay danta qaranka ka horumariyaan danta siyaasadeed iyo midda shaqsiyadeed.

"Saaxiibada Beesha Caalamka* waxay soo dhoweynayaan ku dhawaaqidda in madaxda Dowladda Federaalka Soomaaliya (DFS) iyo Dowlad Goboleedyada Xubnaha ka ah Dowladda Federaalka ah (DGXF) ay kulmi doonaan 15ka Febraayo si loo dhameystiro qabanqaabada hirgelinta heshiiskii doorashada ee 17kii Sebtembar, loona sii amba-qaadi lahaa horumarkii la gaaray intii uu socday shirkii Madashii Dhusamareeb ee dhowaan qabsoomay," ayaa lagu yiri qoraalka.

Bayaanka ayaa lagu daray: "Saaxiibada caalamku ma aaminsana in su’aasha ku saabsan goobta shirka lagu qabanyo ay cudurdaar u noqoto dib-u-dhac kasta ee ku yimaada shir-madexeedkan muhiimka ah. Waxaan ku boorinaynaa madaxda Dowladda Federaalka ah iyo Dowlad Goboleedyada, iyagoo ku shaqaynaya ku wada shaqwynaya niyad wax lagu dhisayo, inay xalliyaan arrimaha yar ee ka harsan wadahadalladii Dhusamareeb isla markaana ay ku heshiiyaan jadwal doorasho oo gaaban kaas oo lagama maarmaan u ah hirgelinta Heshiiskii 17kii Sebtembar".

"Waxaan aaminsannahay inay muhiim tahay in wadahadaladii ka soo billowday Dhusamareeb si dhakhso leh looga mira-dhaliyo marka la guda-galo wada-hadalada soo socda. Waxaan ku dhiirigelineynaa madaxda DFS iyo DGXF ee ka qaybgelaya shir-madaxeedka inay si joogto ah ula xiriiraan oo ay ula tashadaan saamillayda kale ee Soomaaliyeed si wada-hadadalladu u noqdaan kuwo laga baaraan-degay," ayay tibaaxeen.

War-saxaafadeedka ayaa lagu soo xiray: "Waxaa la joogaa waqtigii laga fogaan lahaa tallaabooyinka halka dhinac ah oo ay dhinacyadu keligood qaadaan, isla markaana si dhakhso leh loogu dhaqaaqi lahaa in lagu heshiiyo hirgelinta geeddi-socodka doorashooyinka ee 17kii Sebtember si loo soo doorto madaxda Soomaaliya".

Shirka uu Farmaajo iclaamiyey 15-ka Febraayo ayaa noqdey caqabad cusub markii Villa Soomaaliya ay sheegtay in uu ka dhaco Garowe iaydda oo aan kala tashan saamileyda si gaar ah dowladda Puntland.

GAROWE ONLINE