Beesha Caalamka oo ka Dooday Cunaqabatayn iyo Isbeddel Siyaasadeed iyadoo Xiisadda Soomaaliya Sii Kordhayso

MUQDISHO, Soomaaliya — Wakiillo ka socda beesha caalamka ayaa Khamiistii kulan qarsoodi ah ku yeeshay safaarad reer Galbeed ah oo ku dhex taal xeyndaabka ammaanka sare ee Xalane Compound, halkaas oo ay kaga wada hadleen sii xumeynta xiisadda siyaasadeed ee Soomaaliya iyo mustaqbalka xiriirka ay la leeyihiin dowladda Federaalka.

Ilo diblomaasiyadeed ayaa sheegay in kulanka si gaar ah diiradda loogu saaray sida beesha caalamku u wajihi doonto dowladda Soomaaliya wixii ka dambeeya 15-ka May, xilli walaac xooggan laga qabo xasilloonida siyaasadeed ee dalka.

Qodobada miiska saarnaa ayaa waxaa ka mid ahaa suurtagalnimada in la tixgeliyo siyaasadda World Bank ee loo yaqaan OP 7.30, taas oo lagu dabaqo dalalka ay ka jiraan muran ku saabsan sharciyadda dowladda ama xaalado dastuur oo adag.

Wakiillada beesha caalamka ayaa kulanka ku muujiyay walaac ku saabsan xaaladda dalka, gaar ahaan murannada dhulka, iyo geeddi-socodka dib-u-eegista dastuurka, oo ay sheegeen in uusan ku dhisnayn heshiis siyaasadeed oo ballaaran.

Sidoo kale, waxaa si gaar ah loo falanqeeyay hannaanka doorashooyinka, iyadoo dhacdooyinkii ka dhacay Baydhabo lagu tilmaamay kuwo walaac geliyay hufnaanta iyo kalsoonida geeddi-socodka siyaasadeed.

Doodaha ayaa ku soo dhammaaday is-afgarad guud oo ah in dowladda Federaalka Soomaaliya aysan muujin rabitaan dhab ah oo ku wajahan wada-hadal siyaasadeed oo miro dhal ah, sida ay sheegeen ilo-wareedyadu.

Beesha caalamka ayaa sidoo kale isku raacday in la kordhiyo cadaadiska wadajirka ah ee lagu saarayo dowladda, iyadoo laga guurayo waxa ay ku tilmaameen “diblomaasiyad hoose” loona gudbayo isla xisaabtan cad oo ku saabsan tallaabooyinka dowladda.

Dowladda Federaalka Soomaaliya weli kama aysan hadlin wararka kasoo baxay kulankan.

GAROWE ONLINE