Ciidamo ka socda Jabuuti oo la wareegay ammanka Jalalaqsi
-
- Posted On 15-09-2015, 09:10AM
15 September, 2015(GO)-Ciidamo ka socda dalka Jabuti ayaa badalay kuwii Burundi ee joogay degmada Jalalaqsi ee gobolka Hiiraan.
Ciidamadan oo watay gaadiid dagaal ayaa ka yimi degmada Buulo Burde oo ay horey u joogeen.
Taliyaha ciidamada Jabuti Sakariye Sheekh Ibraahin ayaa shalay gaaray Jalalaqsi, waxaa uu la kulmay ciidamadooda la wareegay ammaanka degmadaaasi, isagoo kala hadlay qaabkay u sugi lahaayeen Amniga.
Sakariye aya sidoo kale ciidamadooda uga digay weeraro uga yimaada ururka Al-shabaab, waxa uuna ugu baaqay inay si wanaagsan ula dhaqmaan bulshada goobahaasi ku sugan.
Lama oga halka loo badalay ciidamadii Burundi oo degmada muddo gacanta ku hayay.
Waa degmadii saddexaad ee loo dhiibo amnigeeda ciidamo ka socda Jabuti, horey waxay gacanta ugu hayeen degmooyinka Baladweyne iyo Buulo Burde.
GAROWEONLINE
