Ciidamo ku sugan Cadaado oo shaqo joojin sameeyay

CADAADO, Somalia- Ciidamada Booliiska degmada Cadaado ee maamulka Galmudug, ayaa banneeyay fariisimaha ay ku leeyihiin magaalada iyagoo faarujiyay saldhigyada dhammaantood oo ay qaybtood ku xiranyihiin rag lagusoo eedeeyay dambiyo kala duwan.

Tallaabadan ayaa waxaa xaqiijiyay, Taliye ku xigeenka Ciidanka Booliska Magaalada Cadaado Cumar Macalin oo la hadlay warbaahinta gudaha Somalia.

Sababta ayuu taliye Cumar ku sheegay intay tahay dhibaato dhinac nolosha ah oo lasoo daristay ciidamada kadib markii ay waayeen xuquuqda muddooyinkii ugu dambeeyay, taasoo keentay in qoyaysas badan ku bur-buraan markii ay ciidamadu waayeen masaariiftii carruurta iyo xaasaskooda.

Taliyaha ayaa intaas ku daray inaysan jirin cida katirsan Booliiska oo shaqo ka haya magaalada, balse taas badalkeeda gadoodeen oo ay banneeyeen goobihii muhiimka ahaa ee ay shaqada ka hayeen.

Wuxuu xusay in dowladda Somalia iyo maamulka Galmudug ku fashilmeen inay buuxiyaan baahida ciidanka oo tilmaamay inay ku shaqeeyaan xaalad adag.

Majirto wax war ah oo kasoo baxay dhinaca maamulka Galmudug oo ku aadan tan gadoodka ciidamada.

Arrintan mid lamid ah ayaa dhawaan ka dhacday degmada Baladweyne ee xarunta gobolka Hiiraan, waxaana lagusoo beegay xilli madaxda cusub dhawaan xafiiska ay la wareegeen kuwaasoo shaqaynaya wax ka yar Bil.

Madaxweynaha cusub ayaa ballan-qaaday inuu meel-saari doono xuquuqda ciidamada iyo mushaharkooda, balse waxay hadda dadaal ugu jirtaa sidii wax loogu qaban lahaa dadka u dhimanaya abaarta ka jirta Somalia.

GAROWEONLINE