Ciidamo la geeyay hoyga Xasan Cali Khayre iyadoo xiisaddu ka sii dareyso Muqdisho

MUQDISHO – Ciidamo dowladda ka tirsan ayaa maanta la dul dhigay hoyga Ra’iisul wasaarihii hore ee Soomaaliya Xasan Cali Khayre, iyadoo ay sii kordhayaan xiisadaha siyaasadeed ee ka horreeya bannaanbaxa mucaaradka ee lagu wado inuu Jimcaha ka dhaco Muqdisho.

Ilo xog ogaal ah ayaa sheegay in ciidamada loo geeyay halkaasi si looga hortago abaabulka iyo dhaq-dhaqaaqyada la xiriira mudaharaadka ay mucaaradku qabanqaabinayaan.

Xaaladda magaalada Muqdisho ayaa lagu tilmaamay mid aad u kacsan, iyadoo mucaaradka iyo dowladda Federaalka ay isku eedeynayaan hurinta xiisadda siyaasadeed iyo xaaladda amni ee caasimadda.

Mucaaradka ayaa ku adkeystay in bannaanbaxu dhici doono, iyagoo sheegay inuu yahay mudaharaad nabadeed oo looga soo horjeedo barakacinta iyo burburinta ka socota magaalada.

Dowladda Federaalka Soomaaliya ayaan weli si rasmi ah uga hadlin ciidamada la geeyay hoyga Xasan Cali Khayre iyo eedeymaha mucaaradka.

GAROWE ONLINE