Dagaal ka dhacay duleedka Baydhabo iyo Wararkii ugu dambeeyay ee laga helayo

BAYDHABO – Iska horimaad xooggan oo u dhexeeyay ciidamada maamulka Koonfur Galbeed iyo Ciidanka dowladda Federaalka oo kaashanaya maleeshiyaad hubeysan ayaa maanta ka dhacay duleedka magaalada Baydhabo, xilli ay kacsan tahay xaaladda siyaasadeed ee gobolka.

Dagaalka ayaa ka qarxay agagaarka magaalada, waxaana la isku adeegsaday hubka noocyadiisa kala duwan. Sida ay sheegtay warbaahinta Koonfur Galbeed, ciidamada KG ayaa iska caabiyay koox hubeysan oo isku dayay inay gudaha u galaan magaalada, kuwaas oo la rumeysan yahay inay xiriir la leeyihiin mucaaradka kasoo horjeeda maamulka hadda jira.

Mas'uuliyiin ka tirsan laamaha amniga ee Koonfur Galbeed ayaa xaqiijiyay inay gacanta ku dhigeen tiro maxaabiis ah oo ka tirsanaa dhinacii weerarka soo qaaday. In kasta oo aan si rasmi ah loo shaacin tirada dhimashada iyo dhaawaca labada dhinac, haddana waxaa jira warar sheegaya in khasaare nafeed uu ka dhashay dagaalka.

Ciidamada maamulka ayaa weli wada hawlgal ay ku baacsanayaan haraadiga kooxihii dagaalka soo qaaday oo dib ugu guraday deegaannada miyiga ah.
Xaaladda Magaalada: Gudaha magaalada Baydhabo waxaa laga dareemayaa feejignaan dheeraad ah, iyadoo ciidamada ammaanka ay adkeeyeen baraha kontoroolka.

Dagaalkan ayaa ku soo beegmaya xilli uu jiro khilaaf siyaasadeed oo u dhexeeya dowladda Federaalka iyo maamulka Koonfur Galbeed, kaas oo salka ku haya arrimaha doorashooyinka iyo amniga gobolka. Ilaa hadda ma jiro wax war ah oo rasmi ah oo ka soo baxay dhanka dowladda Federaalka oo ku aaddan eedeymaha loo soo jeediyay ee la xiriira maleeshiyaadkan.

GAROWE ONLINE