DFS: Weerarkii Masjidka New Zealand waa fal argagixiso oo fulaynimo ah

MUQDISHO, Soomaaliya - Dowlada Soomaaliya ayaa si adag u cambaareysay weerarkii lagu qaaday labo masjid oo ku taalla magaalada Christchurch ee New Zealand.

Falkaan oo uu caalamka si wadajir ah uga dhiidhiyay ayaa lagu tilmaamay in uu ahaa mid argagixisinimo, oo ay geysteen dabley cunsiri ahayd.

Inta la xaqiijiyay 49 ruux oo Muslimiin ah oo ku oogaysay Masaajidaasi Salaada Jimcada ayaa si arxan daran loogu xasuuqay duulaankaasi.

"Soomaaliya oo midnimo u muujineysa dowlada New Zealand waxay u rajeynaysaa kuwa dhaawaca ah soo kabasho deg deg ah," ayaa lagu yiri qoraal kasoo baxay xukuumada federaalka ah.

Sidda ku cad bayaanka, Soomaaliya ayaa ku baaqeysa baaritaan dhab ah oo lagu sameeyay "falkaan argagixisnimo ee foosha xun".

"[Weerarka] waxaa loo aqoonsan karaa in uu yahay fal argagixisnimo oo fulaynimo ah," ayaa laga soo xigtay war-saxaafadeedka.

Ugu dambeyntii, dowlada federaalka ah ee Soomaaliya ayaa dalalka Islaamka ku tartarsiisay in isu kaashadaan sidii loo ciribtiri lahaa Islaam-naceybka.

Xasuuqii Masaajida Christchurch oo dadka lagu dilay ay Soomaali ku jiraan ayaa kooxihii geystay waxay si toos ah uga baahinayeen howlgalkooda baraha bulshada, taasoo su'aallo dhalisay.

Booliska ayaa sheegay in lasoo xiray afar ruux, kuwaasi oo mid kamid ah lagu soo oogay dacwad la xiriirta weerarkaasi, halka kuwa kale baaritaano uu ku socdo.

GAROWE ONLINE