Dib u dhac ku yimid shirka maamul u sameynta gobolada Hiraan iyo Shabeelaha Dhexe
-
- Posted On 03-09-2016, 04:55PM
JOWHAR, Somalia -- Waxaa dib u dhac ku yimid furitaankii Wajiga Labaad, ee Shirka Maamul u samaynta gobolada Shabeellada Dhexe iyo Hiiraan, kaasi is-mari-waa xooggan uu ka taagan yahay tan iyo markii la furay Bishii January, 2016.
IGAD iyo Wasaaradda arimaha Gudaha dowlada Federaalka Soomaaliya, ayaa shaaciyay todobaadkii tagey in shirka Jowhar furmayo maanta oo Sabti ah (September 3), balse dib u dhacay markale.
GO ayaa ogaatay in sababaha dib u dhaca keeney ay kamid yihiin, in ergada qaar ee ka imaaneysay gobolka Hiraan aysan tagin Jowhar.
Ugaas Xasan Ugaas Khaliif oo kamid ah duuba ka ugu muhiimsan Somalia ayaa weli ku adkeysanaya diidmada shirkaan isaga oo doonaya in Hiiraan laga dhigo labo gobol, kadibna loo sameeyo maamul goboleed u gaar ah.
Madaxweyne Xasan Shiikh oo kaashanaya urur goboleedka IGAD ayaa dabada ka riixaya dhinaciisa in labadaan gobol sameystaan maamul goboleed inta aan la gaarin doorashada Somaliya ee sanadka 2106.
GAROWEONLINE
