Diidmada Gelitaanka Mareykanka Ee Garsoore Omar Artan Oo Caro Ballaaran Abuurtay

Garsoore Soomaaliyeed Omar Artan Oo Loo Diiday Gelitaanka Mareykanka Inkastoo FIFA Sheegtay In Arrintiisa La Xalliyay

Garsooraha Soomaaliyeed ee kubadda cagta Omar Artan ayaa loo diiday gelitaanka dalka Mareykanka, halkaas oo uu qorsheynayay inuu garsoore ka noqdo ciyaaraha Koobka Adduunka ee xagaagan.

Omar Artan oo 34 jir ah ayaa u safray Mareykanka isagoo sii maray dalalka Kenya iyo Turkiga. Intii uu ku sugnaa Nairobi ayaa la siiyay baasaboor diblomaasiyadeed si loogu fududeeyo socdaalkiisa.

Soomaaliya waxay ka mid tahay dalalka uu saameeyay xayiraadda socdaalka ee uu soo rogay Madaxweynaha Mareykanka Donald Trump.

Toddobaadkii hore ayay FIFA sheegtay in arrinta fiisaha Omar Artan si buuxda loo xalliyay, islamarkaana uu diyaar u yahay inuu garsoore ka noqdo ciyaaraha Koobka Adduunka. Si kastaba ha ahaatee, waxaa loo diiday inuu galo Mareykanka inkastoo uu watay fiise sax ah iyo baasaboor diblomaasiyadeed.

Wararku waxay sheegayaan in Omar Artan uu dib ugu laabtay magaalada Istanbul ee dalka Turkiga, halkaas oo uu muddooyinkan ku sugnaa.

La-taliyaha sare ee Wasaaradda Dhallinyarada iyo Ciyaaraha Soomaaliya, Ciise Aadan Abshir, ayaa sheegay in Omar Artan uu ka mid yahay garsoorayaasha ugu sumcadda badan Afrika, islamarkaana uu mudan yahay taageerada guud ee bulshada kubadda cagta.

“Omar Artan wuxuu watay fiise sax ah oo Mareykanka ah. Wuxuu dib ugu laabtay Istanbul halkaas oo uu deganaa. In loo diido gelitaanka Mareykanka lagana hor istaago inuu garsoore ka noqdo ciyaarihii loo qorsheeyay waxay dhaawaceysaa isaga shaqsi ahaan, sidoo kale waxay wiiqeysaa qiyamka cadaaladda, kartida iyo ruuxa ciyaaraha,” ayuu yiri Ciise Aadan Abshir.

Omar Artan ayaa garsoore FIFA ah tan iyo sanadkii 2018. Wuxuu soo garsooray tartamo waaweyn oo ay ka mid yihiin Koobka Qaramada Afrika (AFCON) iyo CAF Champions League.

Sannadkii 2025 ayuu ku guuleystay abaalmarinta Garsooraha Ragga ee Sanadka ee CAF, wuxuuna noqday qofkii ugu horreeyay ee Soomaali ah ee loo xusho inuu garsoore ka noqdo wareegga kama dambaysta ah ee Koobka Adduunka.

Dhanka kale, xulka qaranka Iran ayaa sidoo kale la kulmay caqabado dhinaca fiisayaasha ah ka hor Koobka Adduunka. Ciyaartoyda Iran ayaa la sheegay in fiisayaashooda la siiyay toddobaadkii hore oo keliya.

Sidoo kale, xulka Iran waxaa lagu wargeliyay inay maalinta ciyaarahooda gudaheeda ku soo galaan kuna baxaan dhulka Mareykanka iyagoo ka duulaya xaruntooda ku taal dalka Mexico. Dhammaan kulamada heerka guruubyada ee Iran waxaa lagu qaban doonaa gudaha Mareykanka.

Qaar ka mid ah shaqaalaha taageerada ee xulka Iran ayaan weli helin fiisayaashii ay codsadeen. Wasaaradda Arrimaha Dibadda Mareykanka ayaa BBC u sheegtay inaysan oggolaan doonin in Iran ay “nidaamkaasi uga faa’iideysato inay argagixiso ku soo geliso Mareykanka iyagoo adeegsanaya marmarsiinyo been abuur ah.”

GAROWE ONLINE