DOODA Qalbi Dhagax oo ka socota Gollaha Shacabka
-
- Posted On 13-09-2017, 01:25PM
MUQDISHU, Somalia - Xildhibaanada Aqalka Hoose ee Barlamanka Somalia ayaa kulan ku leh xarunta gollaha Shacabka, kaasii oo ay uga doodayeen go'aankii Xukuumadda ayy Qalbi Dhagax ugu gacan gelisay Ethiopia bishii lasoo dhaafay.
Kulanka oo ku furmay Jawi degan, ayaa waxaa soo xaadiray 157 Xildhibaan, iyadoo uu Shir-Gudoominaayo Afhayeenka Baarlamaanka Federaalka, Maxamed Sheekh Cusmaan Jawaari.
Wariyaha Garowe Online ee magaalada Muqdishu, ayaa kusoo waramaya in Xildhibaan kaste oo ka mid ah Golaha Shacabka la siiyay waqti uu kaga hadlo Kiiska Cabdikariin Sheekh Muuse Qalbi Dhagax.
Kulankana maanta ayaa la filayaa inuu kasoo baxay go'aan kama dambaysa ah, oo Gollaha Shacabka ka qaato arinta Qalbi Dhagax, oo aad u haraysay hadal haynta bulshada qeybaheeda kala duwan.
Xildhibaanno fara ku tiris ah ayaa doonaya inay Kiiska Qalbi Dhagax u bedelaan Mooshin lagu rido Xukuumadda Ra'iisul Wasaare Khayre, kuwaasi oo ay kamid yihiin Mahad Salaad, Abshir Bukhaari iyo Axmed Maclin Fiqi.
Xukuumadda Somalia ayaa Qalbi Dhagax u dhiibtay dowladda Ethiopia maadaama uu yahay xubin sare oo katirsan Jabhadda ONLF, iyadoo raacaysa heshiisyo is-dhaafsi dembiiliyaasha iyo Maxaabiista ah oo Somalia la gashay Ethiopia xilligii dowladdii Xasan Sheekh.
GAROWEONLINE
