Doorashada Aqalka hoose ee Beelaha Banaadiriga iyo Somaliland oo ka furmayso Muqdishu
-
- Posted On 30-11-2016, 11:01AM
MUQDISHU, Somalia- Guddiga Doorashooyinka Dadban ee Heer Federaal ayaa shaaciyay in Maanta ay ka furmayso magaalada Muqdishu Doorashada Aqalka Hoose ee Beelaha Banaadiriga iyo Somaliland.
Doorashada oo ka dhacaysa Xarunta Gaadiidka Booliska ee caasumadda Somalia, ayaa waxaa la filayaa in lagu doorto saddex kursi, oo ka mid ah Kuraasta Xubnaha Aqalka Hoose ee Beelahahaas ka heleen Barlamanka Federaalka dalka.
Banaadiriga ayaa la siiyay 5 Kursi, 3 kamid ah Maanta ayaa la filayaa in la doorto.
Afhayeenka Maamulka Gobolka Banaadir Cabdifataax Cumar Xalane, ayaa sheegay in xalay lagu qabtay Xarunta Gobolka Kulan amni, oo looga hadlayay sidii loo sugi lahaa amaanka inta ay socoto Doorashada.
Sidoo kale waxaa Muqdishu maanta ka billaabanayso Doorashada Xubnaha Labada Aqal (Aqalka Sare iy midka Hoose) ee beelaha ka soo jeeda maamulka Somaliland.
Kuraasta Aqalka Sare ee Somaliland ayaa loo kala qeybiyay sida hoos ku xusan;
Waqooyi Galbeed: 3 Kursi
Togdheer: 3 Kursi
Awdal: 3 Kursi
Sanaag: 2 Kursi
Waraaqda kuraastaas lagu qaybiyay oo kasoo baxday guddiga doorashooyinka dadban ee Somalia, ayaa sidoo kale lagu muujiyay murashaxiinta booskaas u taagan.
Maamulka Somaliland, ayaa horay u qaadacay doorashada Somalia, iyagoo xusay inaysan matalin xubnaha ku sugan magaalada Muqdishu.
Doorashooyinka Aqalka hoose ayaa ka dhacaya xarumaha maamul goboleedyada Somalia.
GAROWEONLINE
