Dowladda Puntland oo warka soo saartay Xaaladda Soomaaliya

Garoowe : 16 April 2026: Madaxweynaha Dowladda Puntland Mudane Siciid Cabdullaahi Deni, oo uu weheliyo Madaxweyne Ku-xigeenka Dowladda Puntland Mudane Ilyaas Cismaan Lugatoor, ayaa Shir-guddoomiyey Shirka Golaha Wasiirada Dowladda Puntland.

* Goluhu wuxuu ka hadlay xaaladda guud ee Soomaaliya, gaar ahaan marxlada hubanti la’aanta ah ee dalku galay, kadib markii uu wakhtigii rasmiga ahaa ee Baarlamaanka Soomaaliya uu dhammaaday 14-kii April 2026, iyadoo uusan jirin wax-heshiis lagu yahay.

* Goluhu wuxuu ugu baaqayaa Madaxweynaha Soomaaliya ee wakhtigiisu dhammaanayo, in mudada Bisha ah ee u hartay uu garowsado sidii heshiis loo dhanyahay loo gaari lahaa si dalka ay uga dhacdo Doorasho la isla wada ogolyahay.

* Goluhu wuxuu ansixiyey Siyaasadda daboolida kharashaadka Adeegyada Caafimaadka - oo Golaha ay usoo gudbisay Wasaraadda Caafimaadka, Qorshuhu wuxuu yahay in mustaqbalka fog Dowladda Puntland ay gaarto isku-filnaansho dhinaca adeegyada caafimaadka ah.

* Goluhu wuxuu Warbixin ka dhegaystay Wasiirada Wasaaradaha Cadaaladda , Amniga, Arrimaha Gudaha, Deegaanka, Qorsheynta , Howlaha Guud iyo Wasaaradda Tamarta, Macdanta iyo Biyaha.

-DHAMMAAD-